İnsan öz əqidəsini elan kimi divardan asmamalıdır. Çünki əqidə sözlə deyil, illərin sınağından keçən əməllərlə, həyat tərzi ilə və Vətənə, dövlətə sədaqətlə ölçülür. Hacıqabul Rayon İcra Hakimiyyətinin başçısı Sevindik Hətəmov məhz bu prinsipi rəhbər tutaraq, hər zaman əməli işi ilə dövlətçiliyə və xalqa sadiq olduğunu sübut edən rəhbərlərdəndir. Onu yaxından tanıyanlar gözəl bilirlər ki, o, kabinet arxasında oturub vaxt keçirən məmur deyil; hər an vətəndaşın yanında olan, onların qayğıları ilə nəfəs alan, hər bir problemi özünün şəxsî dərdi kimi qəbul edən əqidə və vicdan sahibidir.

Təəssüf ki, cəmiyyətdə baş verən müsbət prosesləri, rayonun inkişafını və xalqla yerli hakimiyyət arasındakı sağlam münasibəti həzm edə bilməyən bəzi qüvvələr də həmişə tapılır. Son vaxtlar bəzi media qurumlarında belə ləyaqətli dövlət qulluqçularının ünvanına kölgə salmağa çalışan, heç bir reallığa əsaslanmayan qərəzli yazılara rast gəlinir. Belə materialların dərindən təhlili açıq-aydın göstərir ki, onların arxasında heç bir obyektiv jurnalistika prinsipi dayanmır; əksinə, bunlar əvvəlcədən ssenariləşdirilmiş, müəyyən maraqlı dairələrin sifarişi ilə ortaya atılmış ucuz təxribatlardır. Aydın məsələdir ki, heç bir araşdırma aparmadan, faktları qəsdən təhrif edərək yazılan bu cür "məqalələr" yalnız sifarişçilərin çirkin məqsədlərinə xidmət edir və cəmiyyətdə haqlı olaraq ikrah doğurur.

Sevindik Hətəmovu bir çox başqalarından fərqləndirən əsas cəhət onun sadəliyi, təvazökarlığı və təmənnasız xidmət fəlsəfəsidir. O, hər hansı şəxsi ambisiyalar və ya vəzifə davası ilə bu kürsüyə gəlməyib; əksinə, üzərinə düşən məsuliyyətin ağırlığını dərk edərək ölkə rəhbərliyinin etimadını layiqincə doğrultmağa çalışır. Onu hədəfə alanların isə əsas məqsədi fəaliyyətində uğur qazanan, xalqın sevgisini və rəğbətini qazanmış məmurun nüfuzuna xələl gətirməkdir. Lakin unudurlar ki, şər və böhtan heç vaxt həqiqətin üzərini örtə bilməz. Əsassız iddialarla gündəm yaratmağa çalışanlar əslində yalnız öz qabiliyyətsizliklərini, savadsızlıqlarını və jurnalistika etikasına nə qədər yad olduqlarını nümayiş etdirirlər. Bir neçə gün fərqlə eyni mətnləri başqa-başqa saytlarda təkrar dərc etmək isə yalnız "ağalarından" gələn tapşırıqları icra edən "muzdlu nökərlərin" əl-ayağa düşməsindən başqa bir şey deyildir.

Hər bir idarəçinin əsl siması onun gördüyü real işlərlə ölçülür. Sevindik Hətəmovun rəhbərliyi dövründə Hacıqabul rayonunda həyata keçirilən abadlıq-quruculuq işləri, sosial layihələr, vətəndaş məmnunluğunun təmin olunması istiqamətində atılan addımlar hər kəsin gözü qarşısındadır. Rayon sakinlərinin hər zaman üzünü ağ edən, onlara arxa-dayaq olan belə bir rəhbərə qarşı yönələn qarayaxma kampaniyaları əsla nəticə verməyəcək. Xalq hər zaman ağı qaradan seçməyi bacarır, kimin xalq üçün, Vətən üçün tər tökdüyünü, kimin isə kənardan sifariş yerinə yetirdiyini çox gözəl görür.

Sonda bir həqiqəti də qeyd etmək yerinə düşər: sağlam tənqid hər zaman inkişafa təkan verə bilər, lakin bu tənqid məntiqə, dəqiq faktlara və ədalətə söykənməlidir. Sevindik Hətəmov haqqında mətbuatda dərc olunan qərəzli və həqiqətdən uzaq yazılar isə yalnız sərsəm açıqlamalar olaraq qalır və ictimaiyyət tərəfindən rədd edilir. Xalqın qəlbində öz əməlləri ilə taxt quran dürüst insanlara isə belə ucuz qarayaxmalar heç vaxt kölgə sala bilməz.