Mədəniyyət - Pressxeber.com

“44” bədii filminin premyerasının keçiriləcəyi tarix məlum olub

lennon — Mon, 07 Sep 2026 16:16:10 +0400

1 oktyabr 2026-cı il tarixində Heydər Əliyev Mərkəzində “44” bədii filminin çoxdan gözlənilən premyerası baş tutacaq.

Bu barədə Azərbaycan Respublikası Prezidentinin köməkçisi, Heydər Əliyev Fondunun icraçı direktoru Anar Ələkbərov sosial şəbəkə hesabında bildirib.

Qeyd edilib ki, daha sonra filmin nümayişləri ölkənin kinoteatrlarında davam edəcək.

"Premyera ərəfəsində 12 tizer hazırlanıb və qarşıdakı həftələr ərzində onları sizinlə paylaşacağıq. Bu gün isə diqqətinizə filmin rəsmi posterlər silsiləsini təqdim edirik. İlk tizer artıq sabah paylaşılacaq", - paylaşımda qeyd olunub.

Tarixi abidələrə yazılanlar tarixə müdaxilədir

lennon — Fri, 04 Sep 2026 15:15:45 +0400

Tarixi abidələr, qədim qala divarları, daş kitabələr və qayalar sadəcə daşdan və qayadan ibarət deyil. Onlar xalqın keçmişini, dövlətçilik tarixini, mədəni irsini və nəsillərdən-nəsillərə ötürülən milli yaddaşını yaşadan canlı tarixdir.

Tarixi və mədəni irs nümunələrinin müxtəlif yazılarla korlanması son dövrlərdə narahatlıq doğuran hallardan biridir. Belə faktlara İçərişəhərin qala divarları və tarixi tikililərin üzərinə yazıların yazılması, Şuşada tarixi qayaların müxtəlif ifadələrlə cızılması, eləcə də Nizami Kino Mərkəzinin fasadının boya ilə korlanması kimi hallar ictimai qınağa səbəb olub.

Xüsusilə Şuşada qayalara şəhid adlarının yazılması məsələsi tarixi və mədəni irsin qorunması baxımından diqqət tələb edir. Şəhidlərin adlarının əbədiləşdirilməsi və onların xatirəsinin yaşadılması olduqca dəyərli təşəbbüs olsa da, bu məqsədlə tarixi qayaların və digər təbii-mədəni irs nümunələrinin zədələnməsi yolverilməzdir. Dövlətimiz şəhidlərimizin adlarını və əziz xatirələrini müxtəlif layihələr, abidələr və memorial komplekslərlə əbədiləşdirir. Şəhid adına hörmət tarixi qayalara, abidələrə və digər mədəni irs nümunələrinə yazı yazmaqla deyil, həmin irsi qorumaqla göstərilməlidir.

İçərişəhərin qala divarlarına, tarixi binalara, qədim tikililərə və Qarabağın qayalarına müxtəlif adların, yazıların və qrafik təsvirlərin həkk olunması adi bir hərəkət deyil. Nizami Kino Mərkəzinin fasadının müxtəlif yazı və təsvirlərlə korlanması da ictimai və mədəni mühitə hörmətsiz yanaşmanın nümunəsidir. Bu cür əməllər tarixi-mədəni irsin görünüşünə və bütövlüyünə xələl gətirən, cəmiyyətin tarixi yaddaşına hörmətsizlik ifadə edən vandalizm aktıdır. Bu əməlləri törədən şəxslərin müəyyən edilərək məsuliyyətə cəlb olunması və qanunvericiliyə uyğun olaraq cəzalandırılması həm tarixi irsin qorunması, həm də belə halların təkrarlanmaması baxımından mühüm əhəmiyyət daşıyır.

Söhbət yalnız tarixi-mədəni irsin qorunmasından getmir. Təbiətimizi, yaşıllıqlarımızı, meşələrimizi, çaylarımızı, dağlarımızı və bütövlükdə ətraf mühiti də qorumalıyıq. Çünki bizə əmanət olunan bu dəyərlər yalnız bu günün deyil, gələcək nəsillərin də haqqıdır. Tarixi abidəni korlamaq necə yolverilməzdirsə, ağacı kəsmək, meşəni məhv etmək, yaşıllığa zərər vurmaq və təbiəti çirkləndirmək də eyni məsuliyyətsiz münasibətin göstəricisidir. Qorumaq mədəniyyətdir, dağıtmaq isə məsuliyyətsizlik.

Dünyanın bir çox ölkəsində tarixi abidələrin və qayaüstü təsvirlərin qorunmasına xüsusi həssaslıqla yanaşılır, onların üzərinə hər hansı yazı və təsvirin çəkilməsi ciddi şəkildə yolverilməz hesab olunur.

Bəzən insanlar üzərində öz adını yazdığı daşın, divarın və ya qayanın əsrlər boyunca hansı tarixi yaşatdığını düşünmür. Halbuki həmin daşlar bizdən əvvəl yaşayan insanların izlərini qoruyub saxlayıb və gələcək nəsillərə ötürülməsi üçün bizə əmanət edilib. Bizim vəzifəmiz həmin izlərin üzərinə öz adımızı yazmaq deyil, mövcud tarixi izləri qorumaqdır.

Qarabağda azad edilmiş ərazilərdə yerləşən tarixi qayalar, abidələr və digər mədəni irs nümunələri xüsusi mənəvi əhəmiyyət daşıyır. Bu torpaqlar uğrunda canından keçən şəhidlərimizin xatirəsinə hörmət də onların adlarını tarixi irs nümunələrinin üzərinə yazmaqla deyil, həmin irsi qorumaqla ifadə olunmalıdır.

Tarixi qayaya adını yazmaqla heç kim tarixdə iz qoymur. Əksinə, artıq mövcud olan tarixi izə zərər vurur. Tarixə hörmət öz adını tarixə yazmaq deyil, tarixin yazdıqlarını qorumaqdır. Tarixi abidə şəxsi qeyd dəftəri deyil. Qaya və qala divarı üzərinə ad yazmaq xatirə yaratmaq deyil. Bu, bütöv bir xalqın tarixi yaddaşına müdaxilədir.

Milli-mədəni irsi qorumaq yalnız aidiyyəti dövlət qurumlarının deyil, hər bir vətəndaşın mənəvi borcudur.

Xalq yazıçısı Elçinin qəbirüstü abidəsinin açılışı olub

lennon — Mon, 03 Aug 2026 11:02:36 +0400

Xalq yazıçısı Elçinin vəfatının ildönümü ilə əlaqədar məzarı ziyarət edilib.

Ziyarət zamanı həmçinin Xalq yazıçısının qəbirüstü abidəsinin açılışı olub.

Mərasimdə Mədəniyyət Nazirliyinin, Bakı Şəhər İcra Hakimiyyətinin və Ombudsman Aparatının rəhbərliyi, diplomatik korpusun nümayəndələri, eləcə də, Milli Məclisin üzvləri, mədəni-elmi ictimaiyyət, həmçinin mərhum yazıçının ailə üzvləri iştirak ediblər.

Çıxış edən mədəniyyət nazirinin müavini Murad Hüseynov Xalq yazıçısı Elçinin Azərbaycan ədəbiyyatında önəmli yerə sahib olduğunu qeyd edib. Nazir müavini bildirib ki, Elçinin yaradıcılığı yaşadıqca özü də insanların xatirəsində yaşayaq.

Xalq yazıçısı Anar da, öz növbəsində, Elçinin xatirəsinə ehtiramını bildirirək onun yaradıcılığını Azərbaycan ədəbiyyatı üçün yeni bir cığır adlandırıb.

Xalq yazıçısının qızı deputat Günay Əfəndiyeva bildirib ki, atasının vəfatından sonra davamlı şəkildə insanlardan xoş sözlər eşidib: "Atam çox şərəfli ömür yaşayıb və mən şadam ki, onun vəfatından sonra hər kəs onu xoş xatirələrlə yad edir, xatirəsini yaşadır".

G.Əfəndiyeva, həmçinin Prezident İlham Əliyevə, Azərbaycan hökumətinə də Xalq yazıçısının xatirəsinə göstərdikləri diqqət və qayğıya görə təşəkkür edib.

Xalq şairi Nəriman Həsənzadə vəfat edib

lennon — Sat, 01 Aug 2026 09:14:42 +0400

Azərbaycan poeziyasının görkəmli nümayəndəsi, Xalq şairi, dramaturq, ictimai xadim Nəriman Həsənzadə vəfat edib.

Bu barədə Mədəniyyət Nazirliyi məlumat yayıb.

Nəriman Həsənzadə iyunun 26-da səhhətinin pisləşməsi ilə əlaqədar xəstəxanaya yerləşdirilmişdi.

Nəriman Əliməmməd oğlu Həsənzadə 18 fevral 1931-ci ildə Qazax rayonunun Poylu qəsəbəsində anadan olub. 1949–1953-cü illərdə indiki Gəncə Dövlət Universitetinin Filologiya fakültəsində təhsil alıb. 1961-ci ildə Moskvada M.Qorki adına Ədəbiyyat İnstitutunu bitib və orada ikiillik Ali Ədəbiyyat Kurslarında da oxuyub.

Nəriman Həsənzadə 1962–1965-ci illərdə Azərbaycan Dövlət Universitetinin (indiki BDU) Azərbaycan ədəbiyyatı tarixi kafedrasının aspirantı olub, "Azərbaycan–Ukrayna ədəbi əlaqələri" (1941-1945) mövzusunda namizdəlik (fəlsəfə doktorluğu) dissertasiyası müdafiə edib.

O, müxtəlif illərdə "Azərbaycan gəncləri" qəzetində, "Azərbaycan" jurnalında və Televiziya və Radio Verilişləri Komitəsində bir sıra vəzifələrdə çalışıb. 1976–1990-cı illərdə isə "Ədəbiyyat və incəsənət" qəzetinin baş redaktoru olub. Eyni zamanda bir neçə il SSRİ Ədəbiyyat Fondunun Azərbaycan şöbəsinə rəhbərlik edib. 1990–1995-ci illərdə Azərbaycan Ali Sovetinin deputatı olub, 1991–2001-ci illərdə mətbuat və informasiya nazirinin birinci müavini vəzifəsində işləyib. 2004-cü ildən Ədəbiyyat Fondu İdarə heyətinin sədri kimi fəaliyyət göstərib. Xalq şairi uzun müddət Milli Aviasiya Akademiyasının Humanitar fənlər kafedrasına rəhbərlik edib.

Gənc yaşlarından ədəbi yaradıcılığa başlayan Nəriman Həsənzadənin 1960–1970-ci illərdə nəşr olunan "Könlüm şeir istəyir", "Unudulmaz günlər", "Yadına düşəcəyəm", "Nəriman", "Niyə demədiniz", "Zümrüd quşu", "Nabat xalanın çörəyi", "Mənim gecəm-gündüzüm", "Sən bağışladın" və s. kitabları ədəbi-ictimai mühitdə ona böyük şöhrət qazandırıb.

Sosial-siyasi, tarixi və milli ictimai təfəkkürü narahat edən problemlər müəllifin yaradıcılığında xüsusi yer tutur. "Bir az möhlət istəyirəm ömürdən", "Fikir eləmə", "Kimin sualı var?", "Seçilmiş əsərləri", "Mənim nikahımı pozdu təbiət", "Bütün millətlərə", "Taleyin töhfəsi", "Nuru paşa", "Gəlimli-gedimli dünya" və s. kitablarında yer alan, ideya-bədii məziyyətləri ilə seçilən, vətənpərvərlik ruhu və əxlaqi-mənəvi saflıq aşılayan şeir, poema və mənzum dramları ədəbiyyat salnaməmizi zənginləşdirib. Ədibin əsərləri ingilis, fransız, alman, fars, italyan, çex, hind, ərəb, xorvat, rus və s. dillərə tərcümə olunub.

Nəriman Həsənzadənin əsərləri əsasında hazırlanan "Bütün Şərq bilsin", "Atabəylər", "Pompeyin Qafqaza yürüşü", "Nabat xalanın çörəyi" və digər tamaşalar sənətsevərlər tərəfindən böyük rəğbətlə qarşılanıb.

Şairin Azərbaycan ədəbiyyatı və mədəniyyətinin inkişafında mühüm xidmətləri dövlətimiz tərəfindən daim yüksək qiymətləndirilib. O, "Əməkdar incəsənət xadimi" (1981), "Xalq şairi" (2005) fəxri adlarına, "Şöhrət" (2001), "Şərəf" (2011), "İstiqlal" (2021), "Heydər Əliyev" (2026) ordenlərinə və Heydər Əliyev Mükafatına (2017) layiq görülüb. Söz sənətkarı 2002-ci ildən Prezidentin fərdi təqaüdçüsü idi.

CHP-li bələdiyyə sədri saxlanıldı

lennon — Thu, 30 Jul 2026 09:35:34 +0400

Türkiyənin Ankara şəhərinin Etimesqut rayonunda korrupsiya istintaqı çərçivəsində keçirilən əməliyyat zamanı bələdiyyə sədri Erdal Beşikçioğlu saxlanılıb.

Əməliyyat korrupsiya ittihamları üzrə aparılan istintaq çərçivəsində həyata keçirilib.

Məlumata görə, hüquq-mühafizə orqanlarının keçirdiyi əməliyyat nəticəsində Erdal Beşikçioğlu saxlanılaraq istintaqa cəlb edilib. Hadisə ilə bağlı araşdırmalar davam etdirilir.

Qeyd edək ki, Erdal Beşikçioğlu 2024-cü ildə Cümhuriyyət Xalq Partiyasının (CHP) namizədi kimi Etimesqut bələdiyyə sədri seçilib. O, siyasətə qoşulmazdan əvvəl Türkiyənin tanınmış teatr və kino aktyorlarından biri kimi fəaliyyət göstərib.

Şuşada çərkəz musiqiləri ifa edilib

lennon — Mon, 06 Jul 2026 11:52:38 +0400

Şuşada Mədəni və Etnik Müxtəliflik Mərkəzi İctimai Birliyinin təşkilatçılığı, "İpək Yolu" Mədəni və Tarixi Araşdırmalar İctimai Birliyinin tərəfdaşlığı ilə keçirilən "Mədəni və etnik müxtəliflik: tarixin dərsləri, müasir çağırışlar" adlı beynəlxalq konfrans çərçivəsində musiqi proqramı nümayiş etdirilib.

Proqramda “Qarabağ şikəstəsi”, “Şuşanın dağları”, bir sıra çərkəz musiqiləri tanınmış sənətkarlar tərəfindən ifa olunub.

Çarmıxa çəkilmiş vicdanın səsi

lennon — Fri, 26 Jun 2026 11:28:51 +0400

Kənan Doğulu, Beren Saat və daha 20 nəfər narkotikə görə saxlanılıb

lennon — Thu, 11 Jun 2026 10:55:52 +0400

Türkiyədə məşhurlarla bağlı aparılan narkotik istintaqı çərçivəsində daha 22 nəfər saxlanılıb.

NTV-nin yaydığı məlumata görə, saxlanılanlar arasında aktyor Enis Arikan, aktrisa Beren Saat və müğənni Kənan Doğulu da var.

Saxlanılan şəxslər tibbi müayinədən keçirildikdən sonra ifadə vermək üçün Narkotik Cinayətləri ilə Mübarizə İdarəsinə aparılıblar.

Bununla yanaşı, istintaq çərçivəsində daha əvvəl saxlanılan bəzi məşhurların narkotik testlərinin nəticələri açıqlanıb. Məlumata görə, Mabel Matiz, Tarık Tunca Bakır, Aycan Yağcı, Eda Dora, Aslıhan Turanlı, Volkan Bahçekapılı və Yasemin İkbalın analizlərində kokain aşkarlanıb.

Mədəniyyət Nazirliyinin tabeliyindəki təhsil müəssisələrində vahid buraxılış imtahanlarına start verilib

lennon — Wed, 10 Jun 2026 12:06:06 +0400

Mədəniyyət Nazirliyinin sistemində fəaliyyət göstərən incəsənət məktəb və mərkəzlərində ilk dəfə olaraq mərkəzləşdirilmiş buraxılış imtahanları keçirilir.

Bu barədə nazirlik məlumat yayıb.

İyunun 8-dən Bakı şəhərində fəaliyyət göstərən incəsənət məktəb və mərkəzlərində başlayan imtahan prosesi bu gündən etibarən ölkə üzrə Mədəniyyət Nazirliyinin sistemində fəaliyyət göstərən bütün müvafiq təhsil müəssisələrini əhatə edəcək.

Qeyd olunub ki, cari tədris ili üzrə imtahanlarda 8000-ə yaxın şagirdin iştirakı nəzərdə tutulur.

İmtahanların keçirilməsində əsas məqsəd şagirdlərin təhsil müddətində əldə etdikləri nəzəri biliklərin, praktiki bacarıqların və yaradıcılıq potensialının obyektiv qiymətləndirilməsi, eləcə də tədrisin keyfiyyətinin vahid yanaşma əsasında ölçülməsidir.

İmtahanlar müvafiq ixtisaslar üzrə təsdiq edilmiş proqramlara uyğun təşkil olunur.

Buraxılış imtahanlarının nəticələrinə uyğun olaraq, bu ildən ilk dəfə məzunlara elektron şəhadətnamələrin verilməsi nəzərdə tutulur.

İmtahanların yekunlarına əsasən şagirdlərin təhsil müddətində qazandıqları nəticələr müəyyən ediləcək və müvafiq sənədləşmə aparılacaq.

Türkmənistanda Azərbaycan Mədəniyyəti Günləri başlayır

lennon — Thu, 04 Jun 2026 09:24:51 +0400

Sabah Türkmənistanda Azərbaycan Mədəniyyəti Günləri başlayır.

Üç gün davam edəcək tədbirlər çərçivəsində Arkadağ və Aşqabad şəhərlərinin sakinləri Azərbaycanın zəngin mədəni irsi, musiqi sənəti və yaradıcı ənənələri ilə yaxından tanış olmaq imkanı əldə edəcəklər.

Proqramda konsertlər, sərgilər və müxtəlif mədəni tədbirlər nəzərdə tutulur.

Bu layihə iki qardaş ölkə arasında humanitar əlaqələrin daha da möhkəmləndirilməsinə, eləcə də mədəni dialoqun genişlənməsinə xidmət edir.