İdman - Pressxeber.com

Georgi Kondruseviç "Naxçıvan" komandasının baş məşqçisi təyin edilib

lennon — Thu, 10 Sep 2026 15:19:54 +0400

"Naxçıvan" basketbol komandasının baş məşqçisi açıqlanıb.

Bu barədə klubdan məlumat verilib.

Belarusdan olan Georgi Kondruseviçlə mövsümün sonunadək nəzərdə tutulan müqavilə imzalanıb.

Mütəxəssis son olaraq ölkəmizdə "Lənkəran" komandasında işləyib. O, 2014-2021-ci illərdə isə ölkəsinin U-20 komandasının baş məşqçisi olub.

"Sabah" bu gün "Mançester Yunayted"lə üz-üzə gələcək

lennon — Thu, 10 Sep 2026 09:42:50 +0400

"Sabah" komandası UEFA Çempionlar Liqasının əsas mərhələsindəki ilk oyununu bu gün keçirəcək.

Valdas Dambrauskasın baş məşqçi olduğu kollektiv İngiltərədə "Mançester Yunayted"lə üz-üzə gələcək.

"Old Trafford" stadionundakı qarşılaşma Bakı vaxtı ilə saat 23:00-da start götürəcək.

Görüşü Fransadan olan FIFA referisi Villi Delajo idarə edəcək.

Xatırladaq ki, "Sabah" oktyabrın 13-də Bakıda Çexiyanın "Slaviya" kollektivini qəbul edəcək.

UEFA Çempionlar Liqası: "Qalatasaray" bu gün "Sportinq"lə qarşılaşacaq

lennon — Wed, 09 Sep 2026 10:08:34 +0400

UEFA Çempionlar Liqasında əsas mərhələnin I turunun növbəti matçları bu gün keçiriləcək.

İkinci oyun günündə daha 6 qarşılaşma baş tutacaq.

Türkiyə təmsilçilərindən "Qalatasaray" Portuqaliyada "Sportinq"in qonağı olacaq.

Günün maraqla gözlənilən görüşlərindən biri İngiltərədə gerçəkləşəcək. "Liverpul" doğma azarkeşləri önündə İspaniyanın "Atletiko" komandası ilə üz-üzə gələcək.

UEFA Çempionlar Liqası

Liqa mərhələsi

I tur

9 sentyabr

20:45. "Barselona" (İspaniya) - "Feyenoord" (Niderland)

20:45. "Ştutqart" (Almaniya) - "Vikinq" (Norveç)

23:00. "Liverpul" (İngiltərə) - "Atletiko" (İspaniya)

23:00. "Napoli" (İtaliya) - "Arsenal" (İngiltərə)

23:00. PSJ (Fransa) - "Slovan" (Slovakiya)

23:00. "Sportinq" (Portuqaliya) - "Qalatasaray" (Türkiyə)

Xatırladaq ki, Liqa mərhələsinin I turuna sentyabrın 10-da yekun vurulacaq. Azərbaycan çempionu "Sabah" İngiltərədə "Mançester Yunayted"lə üz-üzə gələcək.

Bakıda kamandan oxatma üzrə şəhər çempionatı keçiriləcək

lennon — Mon, 07 Sep 2026 12:55:29 +0400

Bakıda Azərbaycan Kamandan Oxatma Federasiyası (AKOF) və Bakı Şəhər Gənclər və İdman İdarəsinin birgə təşkilatçılığı ilə kamandan oxatma üzrə paytaxt çempionatı keçiriləcək.

Bu barədə AKOF-un mətbuat xidmətindən məlumat verilib.

Hövsan Olimpiya İdman Kompleksinin stadionunda beynəlxalq standartlara uyğun olimpiya sistemi əsasında baş tutacaq yarışda 50-yə yaxın idmançı mübarizə aparacaq. U-15 kateqoriyalı idmançılar 40 metr, böyüklər isə 70 metr məsafədən hədəfi nişan alacaqlar.

Üç gün davam edəcək yarışın proqramına əsasən, sentyabrın 18-də idmançıların məşq və sınaq atışları, 19-da təsnifat və əsas seçmə mərhələləri, 20-də isə final qarşılaşmaları və mükafatlandırma mərasimi təşkil ediləcək.

Çempionatda fərqlənən oxatanlar müvafiq dərəcəli diplom və medallarla təltif olunacaqlar.

Tarixi uğurdan gələcəyə - "Sabah"ın 10 milyon manatlıq inkişaf proqramı - ŞƏRH

lennon — Mon, 07 Sep 2026 11:53:29 +0400

Azərbaycan futbolunda qazanılan böyük nəticənin ən önəmli tərəfi onun hansı istiqamətə yönəldirilməsidir. Bu nailiyyət böyük transferlərə və qısamüddətli hədəflərə xidmət etdikdə təsiri də məhdud olur. Amma bu uğurun dividentləri gələcəyin qurulmasına sərf olunursa, əhəmiyyəti daha böyük məna kəsb edir.

"Sabah" klubunun uşaq futbolunun davamlı inkişafı məqsədilə 10 milyon manatlıq maliyyə proqramı yaratmaq qərarı da məhz bu baxımdan diqqət çəkir. Klub UEFA Çempionlar Liqasının əsas mərhələsinə vəsiqə qazanması münasibətilə Prezident İlham Əliyevin Sərəncamı ilə ayrılan 5 milyon manat maliyyə dəstəyini Azərbaycan futbolunun gələcəyinə yönəltmək niyyətini ortaya qoyub. Bununla kifayətlənməyən ölkə çempionu özü də əlavə olaraq 5 milyon manat ayırmaq qərarına gəlib.

Beləliklə, "Sabah"ın Çempionlar Liqasının əsas mərhələsinə yüksəlməsi sadəcə bir klubun idman uğuru kimi qiymətləndirilmir. Bu nəticədən əldə olunan maliyyənin gələcək nəsillərə yönəldilməsi daha geniş perspektiv ortaya qoyur. Yəni söhbət yalnız bu günün "Sabah"ından deyil, Azərbaycan futbolundan sabahından gedir.

Azərbaycan futbolunda uzun illərdir ən çox müzakirə olunan məsələlərdən biri davamlı inkişaf modelinin formalaşdırılmasıdır. Ayrı-ayrı dövrlərdə klubların uğurlu çıxışları, avrokuboklarda müsbət nəticələri və böyük maliyyə imkanları olub. Ancaq əsas sual həmişə dəyişməyib: bu imkanlar gələcək üçün nə qədər möhkəm baza yaradıb?

Uşaq futboluna yatırım məhz bu sualın ən vacib cavablarından biridir. Çünki peşəkar futbolçu bir gündə yetişmir. Bunun üçün savadlı mütəxəssislər, müasir infrastruktur, tibbi təminat, performans analitikası, təhsil və uzunmüddətli inkişaf proqramı lazımdır.

"Sabah"ın elan etdiyi proqramın diqqətçəkən məqamlarından biri də ayrılan 10 milyon manatın birbaşa xərclənməsinin deyil, qorunaraq artırılmasının nəzərdə tutulmasıdır. Bu yanaşma təşəbbüsü adi maliyyə layihəsindən daha uzunmüddətli modelə çevirə bilər. Məqsəd birdəfəlik böyük məbləğ sərf etmək yox, uşaq futbolu üçün davamlı maliyyə mənbəyi formalaşdırmaqdır.

Azərbaycan millisinin sabiq məşqçisi Arif Əsədov mövzu ilə bağlı "Report"a açıqlamasında "Sabah"ın addımının təqdirəlayiq olduğunu bildirib:

"Bu, klubun təkcə özünü yox, Azərbaycan futbolunu da düşündüyünü, məqsəd və niyyətinin nədən ibarət olduğunu göstərir. Bu gün hamımız bilirik ki, hər şey uşaq futbolundan başlamalıdır. AFFA-nın yeni rəhbərliyi də işə başlayarkən bu istiqamətdə fəaliyyətə start verib. Hamımız bilirik ki, milli komanda klublardan asılıdır. Azərbaycanlı futbolçular yerli klublarda yetişirlər. Bu baxımdan "Sabah"ın addımı ölkə futbolunun gələcəyi üçün hesablanıb. Ümid edirik ki, bu layihə gələcəkdə bəhrə verəcək. Prezident İlham Əliyev tərəfindən futbolumuza böyük diqqət və qayğı göstərilir. U-15 və U-20 dünya çempionatlarının Azərbaycanda təşkil olunacağı da buna nümunədir. U-15 turniri ilə bağlı yeni stadionlar tikiləcək və bu infrastruktur gələcəkdə də bizə lazım olacaq. Bütün bunlar gələcəyə daha pozitiv baxmağa əsas verir".

Əslində, Çempionlar Liqasının əsas mərhələsində iştirakın ən böyük qazancı təkcə meydanda əldə olunan nəticələr və ya maliyyə gəlirləri ilə ölçülməməlidir. Belə turnirlər klublara daha böyük imkanlar açır. Əsas məsələ isə həmin imkanlardan necə istifadə edilməsidir.
"Sabah"ın ortaya qoyduğu mövqe göstərir ki, klub öz uğurunu yalnız indiki komandanın nailiyyəti kimi görmək istəmir. Çempionlar Liqasına yüksəlişdən yaranan maliyyə imkanının müəyyən hissəsinin gələcəyin futbolçularına yönəldilməsi bu uğurun daha geniş mənada dəyərləndirildiyini göstərir.

"Sabah"ın prezidenti Maqsud Adıgözəlov "Report"a açıqlamasında bunun qısamüddətli layihə olmadığını bildirib:

"Sabah Future Fund"ın əsas ideyası məhz uzunmüddətli və davamlı sistem yaratmaqdır. Uşaq futbolunda nəticə bir və ya iki ilə ölçülmür. Bizim üçün əsas göstərici akademiyanın qazandığı kuboklar deyil, yetişdirdiyi futbolçular olacaq. Məqsədimiz daha çox gənc futbolçunun akademiyadan əsas komandaya yüksəlməsi, peşəkar futbolda öz yerini tutması və Azərbaycan millilərinə qədər inkişaf etməsidir. Eyni zamanda, ölkənin müxtəlif bölgələrində istedadlı uşaqları daha erkən aşkarlamaq və onların maddi imkanlarından və yaşadıqları yerdən asılı olmayaraq, inkişaf üçün bərabər imkan yaratmaq istəyirik. Konkret hədəflər, proqramlar və nəticələrin hansı meyarlarla qiymətləndiriləcəyi Fondun təqdimatı zamanı daha ətraflı açıqlanacaq".

M.Adıgözəlov 10 milyon manatlıq proqramın vəsaitlərinin idarə olunmasının necə həyata keçiriləcəyindən və bu kapitalın artırılması üçün hansı maliyyə modeli nəzərdə tutulmasından söz açıb:

"Burada ən vacib məqamı düzgün izah etmək istəyirik: 10 milyon manat xərclənmək üçün nəzərdə tutulan büdcə deyil. Bu, Fondun ilkin kapitalıdır. Sadə desək, məqsədimiz bu 10 milyon manatı xərcləmək yox, qorumaq, idarə etmək və onun gəlir yaratmasını təmin etməkdir. Fondun yaratdığı gəlirin müəyyən hissəsi uşaq futbolunun və akademiyanın inkişafına yönəldiləcək, digər hissəsi isə yenidən kapitala əlavə olunaraq Fondun böyüməsinə xidmət edəcək. Yəni bizim məqsədimiz 10 milyon manatı illər ərzində azaltmaq deyil, əksinə, Fondun kapitalını və onun yaratdığı gəliri ildən-ilə artırmaqdır. Gələcəkdə tərəfdaşların, sponsorların və digər mümkün maliyyə mənbələrinin də bu təşəbbüsə cəlb olunması nəzərdə tutulur. Fondun vəsaitinin necə idarə olunacağı, gəlirin hansı prinsiplərlə bölüşdürüləcəyi və kapitalın artırılması mexanizmləri hazırda hazırlanır. Bütün bu məsələləri Fondun rəsmi təqdimatı zamanı açıq və ətraflı şəkildə ictimaiyyətə təqdim edəcəyik".
Bir sözlə, "Sabah Football Academy Future Talents" proqramı reallaşdırıldığı halda, təkcə bir klubun akademiya layihəsi olmaqdan daha böyük məna daşıya bilər. Güclü akademiyalar ilk növbədə klubların öz gələcəyini təmin edir. Amma uzunmüddətli perspektivdə həmin akademiyalarda yetişən futbolçular milli komandaların da əsasını formalaşdırır.

Azərbaycan futbolunun gələcəyi üçün ən böyük sərmayə bu gün meydanda olan futbolçuya deyil, sabah həmin meydanda oynayacaq uşağa qoyulan sərmayədir. "Sabah"ın təşəbbüsünün əsas fəlsəfəsi də məhz bundan ibarətdir.

Nəticənin real təsirini, əlbəttə, zaman və proqramın praktik icrası göstərəcək. Ancaq indidən görünən əsas məqam budur ki, "Sabah" qazandığı uğuru xərclənəcək bir fürsət deyil, Azərbaycan futbolunun gələcəyinə yatırılacaq kapital kimi görür.

Bəlkə də bu təşəbbüsün ən böyük dəyəri də elə bundadır. Çünki futbolun sabahını qurmaq üçün bugünkü uğurdan düzgün istifadə etmək lazımdır.(Report)

"Sabah" uşaq futbolunun inkişafına dəstək məqsədilə 10 milyon manatlıq maliyyə proqramı yaradacaq

lennon — Sat, 05 Sep 2026 13:57:02 +0400

"Sabah" klubu uşaq futbolunun davamlı inkişafına dəstək məqsədilə 10 milyon manatlıq maliyyə proqramı yaradacaq.

Bu barədə klubun yaydığı açıqlamada bildirilib.

Azərbaycan Prezidenti İlham Əliyevin Sərəncamı ilə "Sabah" klubuna UEFA Çempionlar Liqasının Liqa mərhələsinə vəsiqə qazanması münasibətilə 5 milyon manat maliyyə dəstəyi ayrılıb.

Klub göstərilən dəstəyi Azərbaycan futbolunun gələcəyinə yönəltmək məqsədilə UEFA Çempionlar Liqasında iştiraka görə əldə etdiyi məbləğdən əlavə 5 milyon manat vəsaiti uşaq futbolunun inkişafına ayırmaq qərarına gəlib.

Beləliklə, "Sabah Football Academy Future Talents" ("Sabah Futbol Akademiyası – Gələcəyin istedadları") proqramının ilkin kapitalı 10 milyon manat təşkil edəcək. Bu məbləğin 5 milyon manatı dövlət dəstəyi, digər 5 milyon manatı isə klubun öz vəsaiti hesabına formalaşdırılacaq.

Proqramın əsas prinsipi ilkin kapitalı xərcləmək deyil, qorumaq və artırmaqdır. Vəsaitin peşəkar şəkildə idarə olunaraq gəlir gətirməsi və uzunmüddətli maliyyə mənbəyinə çevrilməsi nəzərdə tutulur.

Bundan əlavə, klubun bu il UEFA Çempionlar Liqasında keçirdiyi oyunlara bilet satışından əldə olunan vəsaitin müəyyən hissəsi də proqrama yönəldiləcək.

Layihənin əsas məqsədi uşaq futbolunun davamlı inkişafını təmin etmək, istedadlı uşaqların aşkarlanması və peşəkar hazırlığını gücləndirmək, müasir məşq metodlarını tətbiq etmək, həmçinin idman elmi, tibbi təminat, performans analitikası, təhsil və fərdi inkişaf istiqamətlərini inkişaf etdirməkdir.

"Sabah" ölkə üzrə istedadların aşkarlanması sistemini genişləndirməyi, uşaqların yaşadıqları regiondan və ailələrinin maddi imkanlarından asılı olmayaraq perspektivli futbolçular üçün bərabər inkişaf imkanları yaratmağı hədəfləyir.

Klub həmçinin təşəbbüsün AFFA uşaq və gənclər futbolunun inkişafı istiqamətində həyata keçirdiyi fəaliyyətlə uzlaşmasına, qarşılıqlı əməkdaşlıq və təcrübə mübadiləsinə xüsusi önəm verdiyini bildirib.

Uzunmüddətli perspektivdə "Sabah" Cənubi Qafqaz və Mərkəzi Asiya ölkələrində fəaliyyət göstərən akademiyalar, futbol məktəbləri və klublarla əməkdaşlığı genişləndirməyi, akademiyanı regionun aparıcı futbol inkişaf mərkəzlərindən birinə çevirməyi planlaşdırır.

"Sabah" ölkə şirkətlərinə və beynəlxalq tərəfdaşlara təşəbbüsə "Bünövrə Tərəfdaşı" formatında qoşulmaq imkanı yaradacaq.

Klub proqramın fəaliyyət prinsipləri, idarəetmə modeli, tərəfdaşlıq mexanizmləri və gələcək inkişaf istiqamətləri barədə ictimaiyyətə əlavə məlumat veriləcəyini açıqlayıb.

Çempionlar Liqası: "Sabah" rəqiblərini Bakı Olimpiya Stadionunda qəbul edəcək

lennon — Sat, 05 Sep 2026 09:26:49 +0400

"Sabah" klubu UEFA Çempionlar Liqasının Liqa mərhələsində ev oyunlarının Bakı Olimpiya Stadionunda keçirəcək.

Bu barədə məlumat UEFA-nın rəsmi saytında təsdiqini tapıb.

Azərbaycan çempionu 4 rəqibini Bakı Olimpiya Stadionunda qəbul edəcəkç

"Sabah"ın ev oyunlarının təqvimi belədir:

II tur

13 oktyabr

20:45. "Sabah" – "Slaviya" (Çexiya)

III tur

20 oktyabr

20:45. "Sabah" – "Borussiya" (Dortmund, Almaniya)

V tur

25 noyabr

21:45. "Sabah" – "Barselona" (İspaniya)

VII tur

20 yanvar

21:45. "Sabah" – "Napoli" (İtaliya)

Qeyd edək ki, "Sabah" Liqa mərhələsində digər 4 görüşünü səfərdə keçirəcək. Komanda "Vikinq" (Norveç) ilə noyabrın 4-də, "Mançester Yunayted" (İngiltərə) ilə noyabrın 10-da, "Vilyarreal" (İspaniya) ilə dekabrın 8-də, "Arsenal" (İngiltərə) ilə isə yanvarın 27-də üz-üzə gələcək.

AFFA 4 klubu cərimələdi

lennon — Thu, 03 Sep 2026 17:15:27 +0400

AFFA İntizam Komitəsi Azərbaycan Premyer Liqasının III turunda keçirilən oyunlarla bağlı qərarlar qəbul edib.

Qərarlara əsasən, 4 klub - “Kəpəz”, “Qəbələ”, “Neftçi” və “Qarabağ” cərimələnib.

“Qəbələ” – “Şamaxı” oyunundan sonra meydançaya kənar şəxsin daxil olması səbəbindən ev sahibi komanda 2500 manat xərcə düşüb.

“Kəpəz” – “Turan Tovuz” matçında 6 futbolçunun sarı vərəqə alması səbəbindən Gəncə təmsilçisinə 700 manat cərimə tətbiq olunub. Oyundan sonra meydana kənar şəxsin daxil olması və azarkeşlərin pirotexniki vasitədən istifadə etməsi səbəbindən isə “Kəpəz” müvafiq olaraq 2500 və 3000 manat cərimələnib.

“Zirə” – “Neftçi” oyununda ikinci sarıdan qırmızı vərəqə alan Elvin Bədəlov 1 oyunluq cəzalandırılıb və bu, “Neftçi”ni 500 manat ziyana salıb. Klub azarkeşlərinin meydana kənar əşya atmasına görə isə daha 2000 manat ödəyəcək.

“Sumqayıt” “Qarabağ”la oyunda azarkeşlərinin rəqib komandanın ünvanına kütləvi şəkildə təhqiramiz ifadələr səsləndirməsinə görə 5000 manat xərcə düşüb. Həmin matçda birbaşa qırmızı vərəqə alan “Qarabağ”ın futbolçusu Kadi Borqes biri şərti olmaqla 3 matç cəzalandırılıb. Klub isə 3000 manat cərimə ödəyəcək. Şərti cəzanın sınaq müddəti 6 ay müəyyənləşdirilib.

"Sabah"ın UEFA Çempionlar Liqasındakı rəqibi "Vikinq" 3 futbolçu ilə müqavilə bağlayıb

lennon — Thu, 03 Sep 2026 09:27:38 +0400

"Sabah"ın UEFA Konfrans Liqasındakı rəqibi Norveçin "Vikinq" klubu "transfer pəncərəsi"nin son günündə heyətini 3 yeni futbolçu ilə gücləndirib.

Komanda Essyen Bassey, Erik Botheym və Henrik Byordalı heyətinə cəlb edib.

19 yaşlı niderlandlı müdafiəçi E.Bassey PSV klubundan transfer olunub. O, 2022-ci ildən Eyndhoven təmsilçisində çıxış edib. Gənc oyunçu Niderlandın aşağı yaş qrupları üzrə millilərinin də formasını geyinib.

İsveçin "Malmö" klubundan transfer edilən hücumçu E.Botheym isə sözügedən ölkənin çempionatında keçirdiyi 19 matçda 10 qol vurub.

29 yaşlı H.Byordal Norveçin digər təmsilçisi "Volerenqa"dan transfer olunub.

Hər üç futbolçu ilə müqavilənin müddəti 2030-cu ilin sonuna qədər nəzərdə tutulub.

Qeyd edək ki, "Vikinq" - "Sabah" matçı noyabrın 4-də baş tutacaq.

Maqsud Adıgözəlov: "Sabah" UEFA Çempionlar Liqasının əsas mərhələsində sonadək mübarizə aparacaq

lennon — Wed, 02 Sep 2026 15:17:42 +0400

"Sabah" UEFA Çempionlar Liqasının əsas mərhələsində sonadək mübarizə aparacaq.

Bunu "Report"a müsahibəsində Bakı təmsilçisinin prezidenti Maqsud Adıgözəlov deyib.

Klub rəhbəri püşkatmadan sonra güclü emosiyalar yaşadıqlarını deyib:

"Açığı, mümkün xalları hesablamaqla məşğul olmamışıq. Püşkatmadan sonra emosiyalar o qədər güclü idi ki, daha çox bizi nələrin gözlədiyinin miqyasını dərk etməyə çalışırdıq. Xallar və növbəti mərhələyə vəsiqə məsələsinə gəlincə, mövqeyimiz çox sadədir: rəqiblərimizin səviyyəsini çox yaxşı anlayırıq, lakin sonadək mübarizə aparacağıq. Bunun bizə neçə xal qazandıracağını isə gələcək göstərəcək".

Maqsud Adıgözəlovun müsahibəsinin tam mətnini buradan oxuya bilərsiniz.