{category-title}
Təhsil Nazirliyinin “Azəriqaz”a 28 min borcu var
Təhsil Nazirliyi 15 təhsil müəssisəsinin qaz istehlakına görə yaranan borcunu ödəyə bilmədiyi üçün məhkəmə verilib.
“Qafqazinfo”nun verdiyi xəbərə görə, “Azəriqaz” İstehsalat Birliyi Şəki Kommersiya Məhkəməsinə müraciət edərək nazirliyin 4 saylı Ərazi Maliyyə Hesablaşma Mərkəzinə qarşı iddia qaldırıb.
İddia ərizəsində qeyd edilib ki, tərəflər arasında təbii qazın alqı-satqısına dair 20.02.2019-cu il tarixli müqavilə bağlanıb və Şəki rayonunda yerləşən 2 saylı tam orta məktəb, 9 saylı tam orta məktəb, 12 saylı tam orta məktəb, 17 saylı 500 yerlik tam orta məktəb, 19 saylı orta məktəb, 20 saylı orta məktəb, Fizika-Riyaziyyat və Humanitar Təmayüllü Litsey, 180 şagird yerlik orta məktəb, Göybulaq kənd tam orta məktəbi, Fazılkənd 56 şagird yerlik modul tipli ümumi orta məktəb, Fazılkənd 56 şagird yerlik modul tipli ümumi orta məktəb, Uşaq Gənclər İnkişaf Mərkəzi, Oğuz rayonunda yerləşən Yemişənli kənd orta məktəbi, Qəbələ rayonunda yerləşən Qəbələ rayon 2 saylı orta məktəb və Qəbələ rayon 3 saylı orta məktəb qazlaşdırılmaqla abonent kodları verilib.
Nazirlik istehlak edilmiş qazın dəyərini ödəmədiyindən onun 32 729,22 manat təbii qazdan istifadəyə görə borcu yaranıb və bu borc ödənilməyib.
“Azəriqaz” borcun ödənilməsi ilə bağlı Maliyyə Mərkəzinə müraciət etsə də, onlar borcun ödənilməsini təmin etməyiblər. Buna görə “Azəriqaz” məhkəməyə müraciət edərək qazdan istifadəyə görə yaranmış 32 729,22 manat borcun, ödənilmiş 30 manat dövlət rüsumunun və 0,40 manat xidmət haqqının tutulması barədə qətnamə çıxarılmasını xahiş edib.
Təhsil Nazirliyinin 4 saylı Ərazi Maliyyə Hesablaşma Mərkəzinə məhkəmə iclasının vaxtı və yeri barədə məlumat verilməsinə baxmayaraq, qurum məhkəmə iclasında nümayəndəsinin iştirakını təmin etməyib və bunun üzrlü səbəbləri barədə məhkəməyə məlumat verməyib.
“Azəriqaz”ın nümayəndəsi isə bildirib ki, onlar məhkəməyə müraciət etdikdən sonra Maliyyə Mərkəzi qismən ödəniş edib və hazırda 28 739,01 manat borcları qalır və həmin pulun ödənilməsini tələb edirlər.
Məhkəmə Təhsil Nazirliyi 4 saylı Ərazi Maliyyə Hesablaşma Mərkəzindən təbii qazdan istifadəyə görə yaranmış 28 739,01 manat borc, 26,67 manat dövlət rüsumu və xidmət haqqı olmaqla, cəmi 28 765,68 manat borc tutularaq “Azəriqaz” İB-nin hesabına ödənilməsinə qərar verib.
