Ermənilərin Azərbaycanın işğal altındakı torplaqlarında keçirdikləri VII Ümumerməni Oyunları ötən gün açıldı. Avqusutun 17-nə qədər davam edəcək və 5244 idmançının qatılacağı yarışlar 17 idman növünü əhatə edəcək.

4 ildən 1 keçirilən yarışlarda qanında cüzi də olsa, erməni qanı olan istənilən şəxs iştirak edə bilər.

Modern.az Ermənistan KİV-nə istinadən xəbər verir ki, Paşinyan hakimiyyətinin imicini yaxşılaşdırmaq və Azərbaycanı təxribata çəkmək üçün hazırlanmış “oyun şou”su ciddi uğursuzluqla üzləşib.

Belə ki, təşkilatı məsələlərə diqqət yetirilməməsinə görə Qarabağa Ermənistan və diaspordan gələn ermənilərə vaxtında qalmaq üçün yerlər ayrılmayıb.

Ümumerməni Oyunları Beynəlxalq Komitəsinin sədri İşxan Zakaryan problemi açıq dilə gətirməli olub.

“Oyunların Qarabağa keçirilməsinə görə burada Yerevandakı şəraitin olmadığını nəzərə almalıyıq. Qarabağda mehmanxanalarda 800 yer olduğu halda, bura 5 mindən artıq idmançı gətirilib”.

Zakaryan bəzi idmançıların kənd evlərində, ağır şərtlər altında yaşadığını söyləyib.

“Məsələn, Suriyadan olan idmançılar kənddə qaldı. Rusiyadan gələnlərin də bir qismi kəndlərə qlamalı olub”.

İdman yarışlarının keçirilməsi üçün idman obyektlərinin, texniki avadanlıqların qənaətbəxş olmaması, komfortlu yaşayış şəraitinin qurulmamasına görə diaspordan gələn idmançıların əksəriyyəti arasında narazılığın yarandığı bildirilir.

Bu səbəbdən Qarabağdakı qondarma rejim rəhbərliyinə təşkilat komitəsindən ciddi iradların daxil olduğu xəbər verilir. Qarabağda infrastukturun yetəri səviyyədə olmamasına görə oyunlar avqustun 9-da Ermənistan ərazisində davam etdiriləcək. 

Xatırladaq ki, erməni diasporunun ən böyük nümayəndə heyətləri Rusiyadan (14 şəhərdən 368 idmançı), ABŞ-dan (11 şəhərdən 318 idmançı), Fransadan (6 şəhərdən 178 idmançı), Avstraliyadan (86) gəlib. İsveç ermənilərini isə cəmi 1 idmançı təmsil edəcək. Yarışlara qatılacaq idmançıların yarıdan çoxu Yerevan, Gümrü, Vanadzor və Qarabağ erməniləridir.